Sport u media, media u sport

Analiżi dwar is-sitwazzjoni tal-medja tal-isport u l-isport f’Malta.

CHARLES CAMENZULI – President AIPS Europe

• X’inhi s-sitwazzjoni mal-isport Malti vis a vis il-medja tal-isport .
• Il-medja tal-isport x’inhi l-pożizzjoni tagħha fil-konfront tal-isport Malti.

Biex wieħed jagħmel analiżi ta’ dan fil-prinċipju, kulħadd għandu jagħmel l-ewwel analiżi marbuta mad-diskorsi li bħala President tal-Għaqda Ġurnalisti Sports kont wassalt fis-Serata ta’ Premjazzjoni ta’ Sport Malta Awards – Għażliet Sportivi Nazzjonali.

Analiżi li turi biċ-ċar is-sitwazzjoni kif inhi llum tal-isport Malti fil-konfront tal-media tal-isport u kif il-medja tal-isport għandha timxi jekk wieħed irid titjib tas-sitwazzjoni attwali.

13 ta’ Frar 2016 :

“ Wasal iż-żmien li nibdew nidentifikaw u nikklassifikaw liema huma dawk ir-riżultati u kompetizzjonijiet li jkun jixirqilhom attenzjoni. L-istess assoċjazzjonijiet għandhom wkoll jimmaturaw.

Ma jistax ikun illi wieħed jippretendi rikonoxximent ta’ kull riżultat li għax miksub barra pajjiżna jsir eloġju żejjed u meta wieħed iwettaq riċerka jsib li l-kompetizzjoni kienet ta’ livell inferjuri .

Wasal iż-żmien li anke l-istess assoċjazzjonijiet jibdlu l-mentalita’ għal mod kif jirreferu għal  suċċess bħala :

• ‘ medalja tad-deheb – fidda jew bronż ’

flok li jgħidu :

• ‘ ġie l-ewwel , it-tieni u t-tielet’.

Ejja nħallu klassifikazzjoni ta’ medalji fuq kompetizzjonijiet internazzjonali rikonoxxuti mill-Kumitati Olimpici jew minn Federazzjonijiet internazzjonali li jorganizzaw Kampjonati Ewropej jew tad-dinja. Kull kompetizzjoni oħra hija sekondarja. Hemm wieħed irid juri maturita’ kif jikklassifika ċerti riżultati u mhux kollha f’keffa waħda.

Daqstant ieħor hemm lok fejn il-media tal-isport tiżviluppa. Jiddispjacini meta anke f’dawn l-iSport Malta Awards – Għażliet Sportivi Nazzjonali ninnota li biċ-ċar mhux il-kollegi kollha jsegwu l-isport kif nixtieq. Inutili bħala Ghaqda Ġurnalisti Sports norganizzaw korsijiet u workshops jekk l-istess media tal-isport ma tkunx kapaċi ssegwi veru mill-qrib dak li d-dixxiplini kollha jkunu qed iwettqu. Huwa fatt illi filwaqt li daħlet responsabilta’ fis-sens li f’kull stadju ta’ dawn l-Għażliet il-vot huwa dejjem dikjarat, hemm lok kif mis-sena d-dieħla għandu jsir għarbiel ta’ min huwa veru denju li jivvota.”

______________________________________________________________________

25 ta’ Frar 2017 :

“ Wasal issa ż-żmien li l-media tal-isport wkoll trid tkompli tiżviluppa.

Wasal iż-żmien li lil hinn mill-informazzjoni li tasal mill-assoċjazzjonijiet , min jirċievi l-informazzjoni huwa fid-dover li jmur lil hinn u jagħmel evalwazzjoni dwar liema kompetizzjoni, kampjonat jew parteċipazzjoni ikun jixraq li tingħata prominenza.

Dejjem tgħallimt li l-verifika m’hemmx isbaħ minnha u fil-qasam tal-media il-verifika hija fattur sagrosant.

Klassifikazzjoni ta’ riżultati hija essenzjali iżda daqstant ieħor il-media trid tibda’ titgħallem kif  tagħmel il-klassifikazzjoni tal-kompetizzjoni.

Ezempju : Jiddispjaċini ninnota li hemm min ipoġġi fl-istess livell Kampjonati Ewropej.

Ma tridx tkun bravu biex tiddistingwi bejn Kampjonat tal-Ewropa ta’ dixxiplina u Kampjonat tal-Ewropa ta’ oħra.

Kampjonati fejn ikollok 40 pajjiż Ewropew u oħrajn fejn ikollok 5 pajjiżi Ewropej….u xorta wieħed jippretendi li l-kreditu għandu jkun l-istess. 

Appell lil kollegi tal-media.

Għamlu ir-riċerka u tibqgħux lura milli tipparagunaw. 

Dan japplika wkoll għal bosta kampjonati tal-Mediterran fejn minn 23 pajjiż ġieli jkollok biss 5 jew 6 u issa moda ġdida fejn qed ikun hemm Logħob tal-Istati ż-Żgħar f’dixxiplini partikolari ġieli bi 3 pajjizi.

Agħar huwa meta ċerti assoċjazzjonijiet biex żgur meta jiġu lura jkollhom il-mument tal-glorja saru jagħżlu l-kompetizzjoni fejn jieħdu sehem għax ikunu jafu li f’dik il-kompetizzjoni kapaċi jirbħu.

Huma każijiet iżolati imma li jsiru.

Min jgħamel ir-riċerka tiegħu dan kollu jinnotah.

Din hija sitwazzjoni fejn il-media trid turi kemm veru mmaturat u kapaci tagħżel u mhux isservi ta’ notice board jew newsletter.”

______________________________________________________________________

Media tal-isport f’Malta:

Minn analiżi dwar dak il-ġurnali ta’ kuljum jew oħrajn li joħorġu darbtejn jew darba fil-ġimgħa jirriżulta li l-medja ta’ paġni dedikati għall-isport huwa ta’ 180 paġna fil-ġimgħa.

Ġurnali ta’ kuljum 144

• In-Nazzjon 30
• L-orizzont 36
• The Malta Independent 36
• The Times 42

 Ġurnali ta’ darba fil-ġimgħa 36

• Il-Kulħadd 4
• Il-Mument 6
• It-Torca 6      
• Illum 6
• Malta Today 6
• The Sunday Times 8

Paġni fil-ġimgħa 180

Wieħed irid iqis ukoll li kull xahar hemm magazin tal-isport li jingħata b’xejn ma’ ġurnal lokali li jolqot bosta dixxiplini sportivi.

Il-perċentwali tal-isport f’ġurnali lokali hija s-segwenti :

• Futbol lokali : 33 %
• Sport lokali : 33 %
• Sport internazzzjonali : 33 %

B’kollox f’pajjiżna f’sena jkunu pubblikati xejn anqas minn :

• 9360 paġna tal-isport.

 Radju  :  TV : aħbarijiet kuljum : medja soċjali : siti

• 78 siegħa : programmi dwar futbol
• 59 siegħa : programmi multi sport
• 101 siegħa : programmi dwar sport speċifiku

• Sehem ir-radju u televiżjoni li jiġbor fih :

• 3 programmi tal-futbol – Radju u TV
• 3 programmi multi sport – Radju u TV
• 5 – 6 programmi televiżivi dwar baskitbol, sewqan, tiġrijiet taż-żwiemel, moviment Olimpiku, waterpolo (fis-sajf)
• Sport f’Għawdex

Trasmissjoni ta’ sport ieħor : rugby, handball, futsal, regatta

Dan apparti is-siti eletroniċi, medja soċjali, u kull mezz ieħor ta’ komunikazzjoni fejn aċċess għal aħbarijiet tal-isport huwa dejjem possibbli u li qed jiżdied minn sena għal sena.

______________________________________________________________________

Tagħrif mill-għaqdiet nazzjonali tal-isport :

It-tabella ta’ hawn taħt hija indikazzjoni ċara illi mhux l-għaqdiet nazzjonali tal-isport kollha jibagħtu t-tagħrif lil medja tal-isport.

Din l-analiżi saret matul l-istaġun ta’ sport 2015 – 2016 . Madankollu matul l-istaġun ta’ sport ta’ wara ma sar ebda tibdil, fis-sens li min kien jibgħat tagħrif , ritratti, filmati eċċ. baqa’ jibgħat u min kien passiv baqa’ u għadu passiv.

(c) Charles Camenzuli

01.08.2017